Саха АССР 100 уонна Кэбээйи улууhа 85 үбүлүөйдээх сылларыгар аналлаах Сиэгэн-Күөл уонна Сииттэ нэһилиэктэрэ табаарыстыы көрсүһүүнү бэрт тэрээһиннээхтик тэрийдилэр.
Сиэгэн-Күөл баһылыга Максим Алексеев улахан делегациялаах, сэргэх күрэхтэрдээх, сонун быыстапкалардаах, ылбаҕай ырыаһыттардаах кэлэннэр биир күн Сииттэ нэһилиэгин олоҕун-дьаһаҕын, үлэтин-хамнаһын билсэн-көрсөн барбыттарыгар махталбытын тиэрдэбит.
Ону таһынан киэҥ-куон программалаах кэлэннэр, волейбол күрэҕэ, хабылык, хаамыска, остуол тенниһигэр, кыайыы иһин кытаанах хапсыһыылар буолан аастылар. Волейбол күрэҕэр Сиэгэн, Сииттэ – 1, Сииттэ – 2 хамаандалар күөн көрсүһүүлэригэр Сииттэ – 2 хамаанда кыайыы үрдүк өрөгөйүн билэн, анал грамоталарынан, мэдээллэринэн наҕараадаланнылар. Хаамыскаҕа, хабылыкка, остуол тенниһигэр Сиэгэн-Күөл хамаандата тэннээҕин булбата. Ити көрүннэри улаханнык баһылаабыттарын көрдөрдүлэр. Истиҥ көрсүһүүнү уруйдаан киэһэ 7 чаастан "Умнуллубат түгэн" диэн икки нэһилиэк кыттыһан, ис сүрэхтэн эҕэрдэлээн туран кэтэһиилээх кэнсиэрпитин бар дьоммутугар бэлэх ууннубут.
Кэнсиэрт иннинэ нэһилиэктэрбит баһылыктара Семён Тимофеев, Максим Алексеев икки өттүттэн истиҥ эҕэрдэ тылларын олохтоохторго тиэртилэр уонна саха дьонун сиэринэн утарыта сэмэй бэлэхтэрин туттарыстылар. Ол кэнниттэн Сиэгэннэр эҕэрдэ кэнсиэри өбүгэ саҕаттан илдьэ кэлбит эбээннии "һээдьэ" үҥкүүлэрин бар дьоҥҥо бэлэх уунаннар, көрөөччүлэр дохсун ытыс тыаһынан зал иһин толордулар. Биир улахан үөрүүлээх, долгутуулаах түгэнинэн буолла 2021 сыллаахха улахан баһаар буолбут ыксаллаах кэмигэр Татьяна, Афанасий Кривошапкиннар Сиэгэнтэн харчыннан көмө ыытаннар, нэһилиэкпит дьоно-сэргэтэ, олохтоох дьаһалта баһылыга махтал сурук уонна Сииттэ кинигэтин туттаран олус долгутта.
Сахабыт сирин 100 сааһыгар анаан уран тарбахтаахтар улахан быыстапкалара тэрилиннэ. Сиэгэн-Күөл эбээлэр кулууптара тикпит үлэлэрэ кырдьык да киһи хараҕын олус үөрдэр, сэргэх, киэн историялаах үлэлэр буолалларын астына-дуоһуйа көрдубут. Сииттэттэн "Сииттэ симэхтэрэ" иис албастарын толору баһылаабыт, социальнай харалта үлэһитэ Ольга Тимофеева дьэрэкээн үлэлэрэ быыстапка остуолун толору баһылаата.
Тэрээһиҥҥэ күүс-көмө буолбут дьоммутугар-сэргэбитигэр махталбытын тиэрдэбит. Улахан тэрээһиммит уоттаах-күөстээх үҥкүүннэн-битииннэн түмүктэннэ.
Пресс-служба МР «Кобяйский улус»
