Тэрээһиҥҥэ Хаңалас, Уус-Алдан улуустарын баһылыктара Олег Иринеев, Алексей Федотов, улуус депутаттарын Сэбиэтин бэрэссэдээтэлэ Анатолий Антонов, Нөмүгү уонна Сиинэ баһылыктара Наум Устинов, Айдан Леверьев, ону сэргэ СӨ Бастакы Президенэ М.Е. Николаев референа Николай Барамыгин, кыраайы үөрэтээччилэр, кинигэҕэ үлэлээбит Юлия Дьячкова, Галина Шадрина о.д.а. кытыннылар. Ону таһынан, интернет ситимин нөңүө элбэх дьон кыттыыны ылла. 

Оройуон баһылыга Олег Иринеев маннык диэн эттэ:

- Саха бэйэтин бэйэтэ дьаһанан олоруутугар, салайыныытыгар Россия ыраахтааҕытыгар тиийэ норуоттарын туһугар турууласпыт биир дойдулаахтарбыт тустарынан, кинилэр үлэлэрин, олохторун итэҕэтиилээхтик сырдатыллан кэрэхсэбиллээх кинигэ тахсыбытыттан бары үөрэбит! 

Икки киин улуустан Уус-Алдантан, Хаҥаластан төрүт былыргыттан саха норуотун кэскилин түстээбит, сирдьит сулус буолбут судаарыстыбаннай, политическай, общественнай деятеллэр суолларын аныгы көлүөнэ дьоно дьоһуннук салгыыр соруктаахпыт. Саха норуотун өтө көрөр өркөн өйдөөх, чаҕылхай дьылҕалаах ааспыт көлүөнэ тумус дьонун ааттарын ааттата, ситиһиилэрин ситимин сириэдитэ туруоххайыҥ! Аныгы XXI үйэҕэ өбүгэлэрбит суолларын хаҥатан, чиҥэтэн Хаңалас сирин дьонун- сэргэтин олоҕо чэчирии сайдарыгар биир санаалаах бары күүспүтүн ууран таһаарылаахтык үлэлиэххэйиң. 

Маны таһынан, кинигэ тахсыытыгар, сүрэхтэниитигэр үлэлэспит, сүүрбүт-көппүт, быһаччы кыттыспыт дьоңңо махтал тылын биллэрдэ.

Бэлиэтээн эттэххэ, «Предтеча» кинигэ СӨ судаарыстыбаннай Мунньа5ын (Ил Түмэн) ыңырыытын бэрэссэдээтэлэ, депутат Александр Жирков бырайыагынан уонна салайыытынан 2016 с. олохтоммут «Национальная интеллигенция и становление государственности народов Якутии» сериянан «Айар» кинигэ кыһатыгар 1000 экз. бэчээттэнэн тахсыбыта.

«Хаңалас улууһа» МТ пресс-киинэ